Mwenyekiti wa makampuni ya IPP Reginald Mengi amefariki dunia.
Taarifa hiyo imethibitishwa leo alfajiri na vyombo vya habari vilivyo chini ya umiliki wake, runinga ya ITV, na stesheni ya Radio ONE.
Mengi alizaliwa mwaka 1944 mkoani Kilimanjaro na umauti umemkuta akiwa mjini Dubai, Falme za Kiarabu baada ya kuugua kwa muda mfupi.
Rais wa Tanzania John Pombe Magufuli, ameongoza mamilioni ya Watanzania kutuma salamu za rambirambi kufuatia msiba huo.
Kupitia ukurasa wake rasmi wa mtandao wa kijamii wa Twitter Magufuli amesema ataendelea kumkumbuka Mzee Mengi kwa mchango wake katika maendeleo ya taifa lake.
Nimesikitishwa na taarifa za kifo cha Mzee na Rafiki yangu Dkt. Reginald Mengi. Nitamkumbuka kwa mchango wake mkubwa ktk maendeleo ya Taifa letu na maono yake yaliyopo ktk kitabu chake cha I Can, I Will, I Must. Poleni wanafamilia, wafanyakazi wa IPP na Jumuiya ya Wafanyabiashara
Mwisho wa ujumbe wa Twitter wa @MagufuliJP
Salamu za rambirambi pia zimetolewa na Msemaji Mkuu wa Serikali ya Tanzania Dkt Hassan Abbas ambaye amenukuu kauli ya marehemu Mengi kuwa; " 'watu wanaoacha alama hawafi', basi mawazo, falsafa, ubunifu na kujitoa kwake vitaendelea kuishi nasi."
Nimepokea kwa masikitiko taarifa za kifo cha Mwenyekiti wa IPP, Mzee Reginald Mengi. Kama alivyopata kusema yeye mwenyewe siku za uhai wake kuwa watu wanaoacha alama hawafi, basi mawazo, falsafa, ubunifu na kujitoa kwake vitaendelea kuishi nasi.
R.I.P Mzee Mengi.
Dkt. H.A.
Mwisho wa ujumbe wa Twitter wa @TZMsemajiMkuu
Waziri wa zamani wa Habari nchini Tanzania Nape Nnauye naye ametumia ukurasa wake wa Twitter kuelezea masikitiko yake juu ya kifo cha mtu aliyemuita kuwa ni 'rafiki, mshakaji, kiongozi na mzazi.'
"Ulinifundisha kuwa kukata tamaa ni dhambi," ameandika Nnauye.
Comments
Post a Comment